ژ پێخەمەت ب هێزکرنا کەلتوورێ پاراستنا ژینگەهێ و زێدەکرنا ڕووبەرێ کەسکاتیێ، زانکۆیا زاخۆ ب هەماهەنگی لگەل ڕێڤەبەریا ژینگەها زاخۆ، پڕۆژەیێ چاندنا (١٠٠٠) داران د ناڤ کەمپا زانکۆیێ دا دەستپێکر.
ل ڕۆژا دووشەمبێ، ڕێکەفتی ١١ی ئایارا ٢٠٢٦، ل ژێر چاڤدێرییا ڕێزدار (پ.د. دیار عبدالکریم سعید) سەرۆکێ زانکۆیێ و ب ئامادەبوونا (پ.د. محمد حسن خمو) هاریکارێ سەرۆکێ زانکۆیێ بۆ کاروبارێن کارگێری و دارایی و (پ.هـ.د. رمضان جعفر مصطفی) هاریکارێ سەرۆکێ زانکۆیێ بۆ کاروبارێن قوتابیان و (پ.هـ.د. نزار عصمت علی) ڕێڤەبەرێ پەیوەندیان، سەرۆکاتیا زانکۆیا زاخۆ ب هەماهەنگی لگەل سەنتەرێ ئارمانجێن گەشەپێدانا بەردەوام (SDGs) ل زانکۆیێ و ب هەڤکاری لگەل لایەنێن پەیوەندیدارێن ژینگەهێ قۆناغەکا نوی ژ کەمپەینا هۆشیاریا ژینگەهێ هاتە ئەنجامدان.
تەوەرێن سەرەکی یێن پڕۆژەی:
دەستپێکرنا کریاری: د ڤێ قۆناغێ دا نێزیکی (٢٠٠) داران هاتنە چاندن، وەک بەردەوامیا وێ پلانێ ئەوا ل دەمێ بووری دەستپێکری بۆ گەهشتن ب ڕێژەیا هزار داران.
بەرپرسیاریا جڤاکی: ئارمانجا سەرەکی یا ڤی پڕۆژەی، بلندکرنا ئاستێ هۆشیاریێ یە دناڤ قوتابی و کادرێن زانکۆیێ دا سەبارەت ب گرنگیا ژینگەهێ و گونجاندن دگەل گوهۆڕینێن سەقایی.
گرنگیا پڕۆژەی د ئاستێ ناڤدەولەتی دا:
ئەڤ دەسپێشخەریە پشکەکە ژ ستراتیژیەتا درێژخایەنا زانکۆیا زاخۆ بۆ بجهئینانا ئارمانجێن گەشەپێدانا بەردەوام یێن نەتەوەیێن یەکگرتی، ب تایبەت:
1. کارێ سەقایی (Climate Action): کێمکرنا کاریگەریێن گەرمبوونا زەڤیێ.
2. ژیان ل سەر ئەردی (Life on Land):پاراستنا فرەچەشنییا بایۆلۆژی.
3. باژێر و کۆمەلگەهێن بەردەوام: ئاڤاکرنا ژینگەهەکا ساخلەم بۆ خویندن و ژیانێ.
ل دوماهیێ، کارگێریا زانکۆیێ دوپات کر کو ئەڤ پڕۆژەیە دێ بەردەوام بیت هەتا گەهشتن ب ئارمانجا دوماهیێ، دا کو کەمپا زانکۆیێ ببیتە نموونەیەکا هەرە جوان و ژینگەهپارێز د ئاستێ زانکۆیێن هەرێمێ دا، کو مفا و جوانیێ بگەهینیتە قوتابیان و تەڤایا جڤاکی.